Įdı 13,000 lemı̀ xo hò, Tsiigehtchic nèk’e hoızı̀ı tł’ohnèk’e t’sǫ ejıe nagı̨̀dè hò, gıxè dı̀ı nèk’e edı agòjà ı̨lè. Ekò, 85,000 lemı̀ xo ts’ǫ̀ tǫdeè gohłı̨ ı̨lè. Dı̀ı dzęę̀ k’e achı̨ dı̀ı nèk’e edı adade.

Ndè gotł’a ts’ǫ̀ ndè nàgoyı̨ı̨̀ xè ndè tł’a sı̀ı tǫdeè gohłı̨ ı̨lè sı̀ı naàyı̨ı̨̀, mǫhdaà ı̨neè tǫdeè gohłı̨ hò ts’ǫ wegòhłı̨, wet’à dı̀ı nèk’e ndè mǫhdaà łetaàtł’ı̀ xè naàtł’ı̀.

Akwełǫ̀ ndè nàgoyı̨ı̨̀ hò, whaàgots’ǫ ejıe wek’exòehdè ı̨lè eyıts’ǫ 13,650 lemı̀ xo hò ekò nàgoyı̨ı̨̀ hò łagı̨̀dè ı̨lè. Dı̀ı whaàgots’ǫ ejıe dı̀ı gıgondı wet’à edàanı̀ dı̀ı nèk’e nàts’edè weghǫ ayı̀ı hoghàgogehtǫlı̀ı̀? Tıch’àadı̀ı ı̨dı 13,000 lemı̀ xo k’e nagı̨̀dè hò, ełets’ǫ nàgı̨̀dè hò edàanı̀ dı̀ı nèk’e nàgı̨̀dè ı̨lè hǫnı?

Akwewhaà, 20,000 lemı̀ xo hò, Canada hazhǫ ahjǫne tǫdeè t’à weka wegohłı̨ ı̨lè. Dı̀ı tǫdeè hazhǫ ndèndeè weka wegohłı̨ ı̨lè, hazhǫ tǫdeè Greenland eyıts’ǫ Antarctıca ndè gotł’à ts’ǫ̀ ndè goɂǫ sı̀ı akǫ tǫdeè detǫ gohłı̨ eyı̀ı lanı.

Dı̀ı tǫdeè Canada nèk’e weka hazhǫ tǫdeè whehchı̀ ı̨lè eyıts’ǫ Edzanèk’e shı̀h yagòla sı̀ı Richardson eyıts’ǫ Mackenzie shı̀h wegà ts’ǫ̀ ajà ı̨lè.

Whaàgots’ǫ ejıe wekw’ǫ mǫhdaà ɂàelà eyıts’ǫ Edzanèk’e gots’ǫ dı̀ı hanı tıch’àadı̀ı nechàcho wegòts’ıhɂà ha wı̨ı̨̀dı-le, tǫdeè gohłı̨ hò dı̀ı ndè k’e hazhǫ tǫdeè hazhǫ ndè ka gohłı̨ wets’ı̨ɂǫ̀.

15,000 lemı̀ xo hò, yazèa edı agòjà ı̨lè eyıts’ǫ tǫdeè nayı̨ı̨̀. Canada wek’èzhı̀ k’àmbaatsǫ̀ǫ̀ ts’ǫhk’e ts’ǫ̀ nayı̨ı̨̀, wet’à tıch’àadı̀ıcho gıgha gındı łǫ gohłı̨ ajà. Tıch’àadı̀ıcho tłı̨cho eyıts’ǫ whaàgots’ǫ ejıe sı̀ı Yukon ts’ǫ dı̨hdę̀ ts’ǫ̀ ajà xè Dehcho ga eyıts’ǫ jǫ Edzanèk’e ts’ǫ̀ ajà.

Shane Van Loon mahsı̀ wets’ı̨whǫ dı̀ı̀, dı̀ı naàhyı̨̀ ayı̨̀la t’à dı̀ı Tsiigehtchic ts’ǫ whaàgots’ǫ ejıe yı̀gǫ̀hɂǫ k’èha dı̀ı ası̀ı hadehzı̨̀ gots’ǫ.

Tǫdeè nàeyı̨ı̨̀ dè wet’à Edzanèk’e ną̀ąnı̨hts’ıı̀ chı̨̀k’è ts’ǫhk’e ndè edàanı̀ wegaht’ı̨ ładı̨ àt’ı̨. Tǫdeè nàeyı̨ı̨̀ dè, ndè k’e ı̨zhı̀ı ts’ǫ̀ nàeyı̨ı̨̀ dè hot’a hanı̀ t’a ndè wegaht’ı̨ àt’ı̨. Dı̀ı ndè ı̨zhı̀ı ts’ǫ̀ nı̨ı̨̀ɂa sı̀ı wet’à dehtsòa eyıts’ǫ Peel Plateau edàanı̀ wegaht’ı̨ sı̀ı̀ ładı̨ àt’ı̨̀.

Edzanèk’e Sitigi Lake gà goı̨̀walèa Mıner Rıver k’e tǫdeè nàyı̨.

Įwhą ndè nàgòeyı̨ dè tǫdeè sı̀ı gohłı̨, ı̨zhı̀ ndè nàgòeyı̨ wegaht’ı̨ sı̀ı, ehtł’è ı̨zhı̀ı ts’ǫ̀ haı̨̀lı̨ t’à ı̨zhı̀ı ts’ǫ̀ at’ı̨. Dı̀ı hanı tǫdeè nàeyı̨ dè ı̨doò ts’ǫ̀ nàgòeyı̨. Dı̀ı hanı Łık’è tǫdeè nàeyı̨ dè, golı sı̀ı wekat’ı̨.

Edzanèk’e Peel Plateau tǫdeè nàeyı̨ yeèt’a.

Tǫdeè nechà sı̀ı̀ weghǫ hòejı̨ adade, wet’à tı̨lı ładı̨ àt’ı̨, whàedǫ tı̨lı eyıts’ǫ ndè wet’àhòet’ı̨ ı̨lè sı̀ı wexıı̀dı xè ładı̨ ade ha. Tǫdeè ndè k’e ı̨zhı̀ı ts’ǫ̀ nàeyı̨ dè wet’à tıch’àadı̀ı weghǫ hòejı̨ ade ha dı̀le, ehtł’ètı̀ ı̨zhı̀ı ts’ǫ̀ nàı̨̀lı̨ dè tıch’àadı̀ı weyı̀ı̀ deèwı̀ t’à wexè nàelı̨ ha dı̀le. Įneè edlàatłǫ xo gots’ǫ dı̀ı hanı ndè ı̨zhı̀ı ts’ǫ̀ nàeyı̨ sı̀ı 30 hectares hot’e (37 Canada ts’ǫ sǫnàgedè k’e hatłǫ) ı̨łè lemı̀zhǫ cubic metres nahyı̨ ha dı̀le (600,000 lemı̀ satsǫ̀mbehchı̨ı̨̀ laàtłǫ) hazhǫ dehtsòa, tı̀a hanı̀-le dè tıchombaà ts’ǫ̀ hàewı̀.

Edzanèk’e edı adadè eyıts’ǫ sı̀ı̀ gotsoo sı̀ı agǫ̀t’e wet’à nechàgǫǫ̀ eyıts’ǫ whagots’ǫ̀ tǫdeè wegohłı̨. Dı̀ı dzęę̀ k’e gonèk’e edı adadè t’à ats’ǫ hanı̀ ndè nàgòeyı̨ ade ha.

Edzanèk’e chı̨k’èdą̀ąnı̨hts’ıı̀ ts’ǫhk’e tǫdeè haı̨̀tǫh wegaht’ı̨.